Акылбек Жапаров Кочкор айылындагы жаңы автобекеттин курулушунун жүрүшү менен таанышты

Министрлер кабинетинин төрагасы Акылбек Жапаров Кочкор айылындагы жаңы автобекеттин курулушунун жүрүшү менен таанышты. Өкмөттүн басма сөз кызматынан билдиргендей, бүгүнкү күндө долбоордук-сметалык документтер толукталып, мамлекеттик экспертизага тапшырылды.

Жапаров белгилегендей, жаңы автобекет райондун транспорттук жеткиликтүүлүгүн кыйла жакшыртат, бул жергиликтүү экономиканы өнүктүрүүгө жана калктын жашоо сапатын жакшыртууга өбөлгө түзөт.

"Ал андан ары Кочкор айылындагы Ормон-Хан сейил багын автоматтык сугаруу системасы менен таанышты. Автоматтык ирригациялык системаны орнотуу иштери быйыл июнь айында башталып, август айында суу түтүктөрүн орнотуу менен аяктаган. Ошондой эле 100 метр тереңдиктен суу чыгаруу үчүн скважина бургуланган. Учурда 2025-жылдын жазында баштала турган газон чөптөрүн отургузууга даярдык көрүү иштери жүрүп жатат.

Өкмөт башчы мындай системаларды киргизүүнүн маанилүүлүгүн белгилеп, суу ресурстарын пайдаланууну оптималдаштырууга багытталган иштерди күчөтүүнү тапшырды", - деп айтылат маалыматта.