Бишкекте 4 миллиондон ашык акчаны карактап кеткен чет элдиктер кармалды

Бишкектин борборунда тапанча менен куралданган эки адам А.Э. аттуу жаранга кол салып, 4 миллион 500 миң рубль акча каражатын карактап кетишкен. Бул туурасында ИИМдин басма сөз кызматынан билдирди.

Маалымдалгандай, окуя Биринчи май райондук ички иштер башкармалыгында катталып, Кылмыш-жаза кодексинин 207-беренеси менен кылмыш иши козголгон.

ИИМдин кылмыш иликтөө башкы башкармалыгынын кызматкерлери жүргүзгөн операциянын жүрүшүндө Бишкек шаарынын аймагында каракчылык кылышкан 1990-жылы туулган Д.Э. жана 1997-жылы туулган М.У. аттуу жарандар кармалган. Алар Бишкекте ижарага алынган батирлерде жашагандары аныкталган. Экөө тең өз мекенинде кылмыш жасагандыгы үчүн издөөдө жүргөнү такталды. Кармалгандардан 3 686 000 рубль акча каражаты табылып алынды.

Шектүүлөр убактылуу кармоочу жайга киргизилип, аларга карата камакка алуу баш коргоо чарасы колдонулду.

Кылмыш иши боюнча тергөө иштери уланууда.