Исламабаддагы митингчилер полиция менен кагылышты (видео)

Пакистандын мурдагы премьер-министри Имран Хандын абактан бошотулушун талап кылган тарапташтары полиция менен кагылышып, Исламабаддын борборуна бийлик орноткон баррикадаларды бузуп өтүштү. Бул туурасында чет элдик басылмалар жазышууда.

Маалымдалгандай, ага карабастан полиция жана аскерлер демонстранттарды борбордук аймактардан сүрүп чыгарууга жетишкен. Митингчилер менен полициянын ортосунда кагылышуу болуп, демонстранттарга каршы көздөн жаш агызуучу газ жана желим октор колдонулган.

Пакистандын премьер-министри Шахбаз Шариф демонстранттар төрт аскерди унаалар менен тебелеп кетип, алар каза болушканын билдирди.

Имран Хандын миңдеген тарапташтары Исламабадга чогулуп, былтыр коррупция боюнча айыпталып абакка кесилген 72 жаштагы мурдагы премьер-министрди бошотууну талап кылышууда.

Белгиленгендей, шаарда дээрлик интернет жок, мектептерде сабактар ​​токтотулган.

Буга чейин Пакистандын бийлиги ар кандай жыйындарды, анын ичинде нааразылык акцияларын жана митингдерди өткөрүүгө тыюу салгандыгы маалыматта кошумчаланган.