Абхазияда жаңы президент шайланууда

Абхазияда президенттик шайлоо башталды. Бул туурасында чет элдик басылмалар жазышууда.

Маалымдалгандай, шайлоо борборлору республиканын тургундарына эшигин ачты.

Өлкө башчысына жалпы 5 талапкер ат салышууда.

- Абхазиядагы белгилүү саясатчыс Бадра Гунба;

- Орусиядагы мурдагы соода өкүлү Олег Барциц;

- республиканын көзөмөл палатасынын экс-жетекчиси Роберт Аршба;

- оппозициячы Адгур Ардзинба;

- “Кара деңиз өнүктүрүү” банкынын төрагасы Адгур Хурхумаль.

Борбордук шайлоо комиссиясынын маалыматы боюнча, Абхазиянын өзүндө 152 шайлоо участогу добуш берүү үчүн жабдылган, ал эми Орусиянын Москва менен Черкес аймактарына да коюлган. Шайлоочулардын негизги тизмесине 134 миң адам киргизилген. Добуш берүүнүн алдын ала жыйынтыгы 16-февралда белгилүү болот.

Белгилей кетсек, 11-ноябрда Абхазияда оппозициянын өкүлдөрүн Мамлекеттик коопсуздук кызматынын кызматкерлери кармап кеткенден кийин массалык башаламандыктар башталган. Митингчилер президенттин жана өкмөттүн имараттарын басып алып, өлкө башчысын кызматтан кетишин талап кылышкан. Андан соң Абхазиянын кызматтан кеткен президенти Аслан Бжания республикадан чыгып кеткен.