Адылбек Касымалиев Казакстандын президенти Касым-Жомарт Токаев менен жолукту (фото)

Бүгүн, 25-февралда Министрлер кабинетинин төрагасы Адылбек Касымалиев Казакстанга болгон расмий сапарынын алкагында Астана шаарында мамлекет башчы Касым-Жомарт Токаев менен жолукту. Бул тууралуу кыргыз өкмөтүнүн маалымат кызматы кабарлады.

Маалымдалгандай, жолугушуунун жүрүшүндө эки өлкөнүн мамлекет башчылары тарабынан буга чейин жетишилген саясий, соода-экономикалык, суу-энергетика, маданий-гуманитардык жана башка тармактар боюнча кызматташууну тереңдетүү жана максималдуу ишке ашыруу маселелери каралды.

Ошондой эле кыргыз-казак мамлекеттик чек арасындагы айрым учурда болуп жаткан жүк ташуучулардын кезек күтүүсүн болтурбай турган электрондук кезек системасын киргизүү, өткөрүлүп жаткан жүктөрдү текшерүүнү жеңилдетүү, кошумча Кичи-Капка–Бесагаш жана Камышановка–Ак-Суу өткөрүү пункттарын ачуу боюнча жүргүзүлүп жаткан иштер тууралуу сүйлөшүү жүргүзүлдү.

Сүйлөшүүнүн жыйынтыгында Кыргызстандын жана Казакстандын жарандарынын бакубатчылыгы үчүн жетишилген буга чейинки макулдашууларды ишке ашырууну жана аны бекемдөөнү макулдашышты.