Өкмөт башчы Тажикстанга барды

Министрлер кабинетинин төрагасы Адылбек Касымалиев бир күндүк иш сапары менен Тажикстандын борбору Дүйшөмбү шаарына барды. Бул тууралуу бүгүн, 4-мартта өкмөттүн басма сөз кызматынан билдирди.

Маалымдалгандай, аэропорттон аны Тажикстандын премьер-министринин орун басары Зиезода Сулаймон тосуп алды. Сапардын алкагында премьер-министри Кохир Расулзода менен тар жана кеңейтилген форматтарда сүйлөшүүлөр пландаштырылган.

Жолугушуунун жүрүшүндө Кыргызстан менен Тажикстандын ортосундагы эки тараптуу мамилелерди чыңдоо, соода-экономикалык, энергетикалык, транспорттук жана маданий-гуманитардык тармактарды камтыган кызматташуунун келечектүү багыттарын кеңейтүүгө багытталган маселелер талкууланат.

Мындан тышкары Тажикстандын гидроэнергетика тармагындагы тажрыйбасы менен таанышуу үчүн Рогун ГЭСине баруу каралган.