Худжанддагы иш-чаралардын жыйынтыгы. Садыр Жапаров Бишкекке кайтып келди

Кечээ, 31-мартта президент Садыр Жапаровдун Худжанд шаарына болгон иш сапары аяктады. Бул туурасында мамлекет башчысынын маалымат кызматы билдирди.

Маалымдалгандай, иш сапар бир катар жемиштүү жыйындар жана жолугушуулар менен коштолду.

- Садыр Жапаров Тажикстандын президенти Эмомали Рахмон менен тет-а-тет форматында сүйлөшүүлөрдү өткөрдү;

- Ратификациялык грамоталар менен алмашуу жөнүндө протоколго кол коюлду;

- Эки мамлекеттин лидерлери “CASA-1000” долбоорунун алкагында видеоконференция байланыш режиминде "Датка-Сугд" чубалгысын ишке киргизүү аземине катышты;

- Садыр Жапаров, Тажикстандын жана Өзбекстандын өлкө башчылары менен үч тараптуу сүйлөшүүлөрдү өткөрдү;

- Үч өлкөнүн президенттери үч мамлекеттин мамлекеттик чек араларынын кесилишкен чекити жөнүндө келишимге жана Түбөлүк достук жөнүндө Худжанд декларациясына кол коюшту;

- Үч өлкөнүн мамлекеттик чек аралары кесилишкен чекитте орнотулган символикалык стеланын ачылышы болду. Ага үч өлкөнүн башчылары катышты. Салтанаттуу иш-чара Худжанд шаарынан видеоконференция байланышы форматында өттү;

- Худжанд шаарында Садыр Жапаров менен Өзбекстандын президенти Шавкат Мирзиёевдин жолугушуусу болду;

- Худжанд чебине барып, Нооруз майрамына карата уюштурулган маданий иш-чараларга катышты;

- Жыйынтыктоочу иш-чара – Худжанд шаарынын борбордук стадионунда эл аралык Нооруз майрамына арналган Кыргызстан, Тажикстан жана Өзбекстандын маданият жана искусство ишмерлеринин катышуусунда концерттик программа болду.