Си Цзиньпин: "Тариф согушунда жеңүүчү деген болбойт"

АКШнын тарифтик саясатына Евробиримдик менен Пекин бирге каршы туруп, соода айдыңын чогуу коргошу керек. Бул тууралуу Кытайдын президенти Си Цзиньпин Пекинде болгон Испаниянын премьер-министри Педро Санчес менен жолугушуусунда билдирди.

"Тариф согушунда жеңүүчү деген болбойт, бүтүндөй дүйнөгө каршы чыгуу акыры жалгыз калуу дегенди түшүндүрөт", - деген ал.

Чет элдик басылмалар Си Кытай эч качан бирөөдөн жардам сурабаганын айтып, негизсиз басым-кысымдан коркпой турганын баса белгилегенин жазышты.

Буга чейин АКШ менен Кытайдын ортосунда соода согушу күчөп жатканда Дональд Трамп Си Цзиньпинди жакшы көрөрүн айтып, "досум" деп атаган.

Эки өлкө бири-биринин товарларына болгон бажы алымдарын улам-улам көртөрүүдө. Буга Трамптын чет элдик товарларга бажы алымдарын киргизүүсү себеп болгон. Анда алгач Кытайга карата алымдар 34 пайыздык чекте киргизилген.