Аксыда сел жүрдү (видео)

Жалал-Абад облусунун Аксы районунда сел жүрдү. Бул тууралуу Өзгөчө кырдаалдар министрлиги билдирди.

Маалыматка ылайык, кечээ, 2-майда саат 18:00 чамасында Ак-Суу жана Сары-Челек айыл аймактарында мөндүр аралаш жааган жамгырдан улам сел жүргөн.

"Сары-Челек айыл аймагынын Кызыл-Туу айылындагы Баатырбек тилкесинде эки сел сайынан суу 10 турак үйдүн короо жайын каптап өтүп, Баатырбек тилкесинин Сары-Челек – Кербен унаа жолуна кум-шагылдарын агызып келген. Мындан улам унаалардын өтүүсүнө тоскоолдуктар жаралган.

Ушул эле күнү Ак-Суу айыл аймагынын Төө-Басты айылында кокту-колоттордон түшкөн сел болжол менен 1500 метр ички чарбалык жолдун бетин жууп, айрым жерин бузуп кеткен. Жол каттам токтогон эмес. Мындан сырткары 5 турак үйдүн короо-жайын каптап кеткен. Айылдын 3 социалдык мекемесин сел суулары каптаган", - деп айтылат маалыматта.

ӨКМ жеринде куткаруучулар иш алып барып жатканын белгиледи. Ошондой эле министрликтин маалыматында буга жергиликтүү бийлик өкүлдөрү да көзөмөл жүргүзүп жатканы айтылат.