Ош. “Горсвет” ишканасынын жетекчиси эскертүү алды

Бүгүн, 13-январда Ош шаарынын мэриясында жыйын болуп, анда вице-мэр Ильяс Ражапов “Горсвет” ишканасынын жетекчисине жарык менен камсыз кылууда аткарылбаган иштер үчүн эскертүү берди. Бул тууралуу мэриянын басма сөз кызматы билдирди.

"Ак-Тилек кичи районунда төрт лампочка бир жума мурун күйүп калган. Сиздер болсо аталган көйгөйдү чечүүгө эч кандай чара колдонбодуңуздар",- деди Ильяс Ражапов.

Ошондой эле Ильяс Ражапов жакында мектептерде III чейрек башталып жаткандыгына байланыштуу аларды  жетишерлик деңгээлде жылуулук менен камсыздоо үчүн жылуулук түтүктөрүн текшерип чыгуу тапшырмасын да берди.