Гимндин жаңы редакциясы боюнча республикалык сынак жарыяланды

Өлкөдө мамлекеттик гимндин жаңы редакциядагы текстинин жана музыкасынын мыкты долбоорлорун тандоо боюнча республикалык сынак жарыяланды. Бул тууралуу кечээ, 13-июнда Маданият, маалымат жана жаштар саясаты министрлигинен билдиришти.

Маалым болгондой, сынак ачык түрдө 2 этапта өткөрүлөт:

– Текстинин долбоорлорун тандоо;

– тандалып алынган тексттердин негизинде музыкасынын жаңы редакциясынын долбоорун тандоо.

Сынакка мурда катышкан жарандар жаңы эмгектери менен катыша алышат. 1-этапта акындар, автордук жамааттар (музыкалык чыгармачылык жамааттар, ошондой эле башка уюмдар – 5 адамдан ашпаган курамда) катыша алышат.

Сыныктын 2-этабына композиторлор, музыканттар, обончулар, автордук жамааттар (музыкалык чыгармачылык жамааттар, студиялар, союздар, ошондой эле башка уюмдар – 5 адамдан ашпаган курамда) сынактын 1-этабында тандалып алынган тексттерге карата жазылган музыкалык чыгармалары менен катышууга мүмкүнчүлүгү бар.

Сынактын 1-этабына катышуу үчүн табыштаманын кагаз жүзүндөгү варианты тиркелген материалдар жана сынактык долбоорлор менен биргеликте 7-июлга чейин төмөнкү дарекке жөнөтүлөт:

720040, Кыргыз Республикасы, Бишкек шаары, Пушкин көчөсү, 78.

Сынактын 1-этабына катышууга табыштаманын электрондук (сканерден өткөрүлгөн) варианты тиркелген материалдар жана сынактык долбоорлор менен бирге 7-июлга чейин gimn.2025@minculture.gov.kg электрондук дарегине жөнөтүлөт.

Ведомстволор аралык комиссия сынакка келип түшкөн чыгармаларды 25-июлга чейин карап чыгып, 5 мыкты эмгекти тандап алат.

Сынактын 2-этабына катышуу үчүн өтүнмөнүн кагаз жүзүндөгү варианты тиркелген материалдар жана сынактык долбоорлор менен биргеликте 8-сентябрга чейин жогорудагы дарекке жөнөтүлөт.