Израилдин армиясы бир суткада Газа тилкесине 140тан ашуун сокку урду

Израилдин армиясы акыркы 24 саат ичинде Газа тилкесиндеги 140тан ашык максаттуу объекттерге абадан сокку урган. Бул тууралуу бүгүн, 1-июлда армиянын маалымат кызматы кабарлады.

"Өткөн сутка ичинде Израилдин аба күчтөрү Газа тилкесиндеги 140тан ашуун террордук объекттерге сокку урду. Алардын арасында террорчулар, аскердик түзүмдөр, ракета атуу үчүн колдонулган жабдуулар, Израил армиясына коркунуч жараткан объекттер, курал-жарак кампалары жана башка террорчулардын инфраструктуралары болгон",- деп айтылат билдирүүдө.

Израил армиясы 18-марттын түнүндө Газа тилкесине соккуларды кайра баштаган. Бул чечим палестиналык ХАМАС кыймылы АКШ сунуш кылган ок атышпоо режимин узартуу жана туткундарды бошотуу планын четке каккандан кийин кабыл алынган.

Расмий түрдө Израил менен ХАМАСтын ортосундагы убактылуу тынчтык 1-мартта аяктаган, бирок тараптар ортосундагы сүйлөшүүлөр улангандыктан аскердик аракеттер кайра жанданган эмес болчу.

Бирок Израил Газа тилкесине ичүүчү суу даярдаган тузсуздандыруучу заводго электр энергиясын берүүнү токтотту жана гуманитардык жардам ташыган жүк унааларынын киришине тыюу салды.