Казакстанда көчөлөрдө валютанын курсун көрсөткөн электрондук таблолорго тыюу салынды

Казакстанда накталай чет элдик валюта менен алмашуу операциялары боюнча эрежелерге өзгөртүүлөрдү киргизген токтом жарыяланды. Бул тууралуу казак басылмалары жазышууда.

Документке ылайык, валютанын курсу көрсөтүлгөн стенддер алмашуу жайынын ичинде же операциондук кассанын түз жанында жайгаштырылышы керек.

Бул маалыматтык стендди алмашуу жайынын сыртында, анын ичинде имараттардын жана курулмалардын чатырында, тышкы бетинде, стационардык, жылма жана сыртка чыгарылуучу стенддерде жайгаштырууга жол берилбейт.

Бул маалыматтык стенд алмашуу жайынын сырткы ачык мейкиндигинен көзгө көрүнбөшү да шарт.

Бул талаптар алмашуу жайы көп функциялуу имараттарда (анын ичинде бизнес борборлордо), темир жол вокзалдарында, казинолордо, эл аралык аэропорттордун аэровокзалдарынын ичинде, автотранспорттук, деңиз жана дарыя чек ара өткөрмө пункттарынын аймагында жайгашкан учурда гана колдонулбайт.

Ошондой эле токтомдо ар бир алмашуу жайында накталай чет элдик валюта менен алмашуу операцияларын жүргүзүүгө берилген лицензиянын көчүрмөсү казак жана орус тилдеринде кардарлар көрө ала турган жерде илиниши керектиги айтылган.