16 жаштагы өспүрүм токойдо 13 жана 16 жаштагы кыздарга кол салды

Домодедово шаарчасындагы токойдо өспүрүм балка менен эки кызга кол салды. Бул тууралуу Москва районунун прокуратурасынын басма сөз кызматы билдирди.

Тергөөнүн алдын ала маалыматы боюнча, 11-июлда кечинде 16 жаштагы өспүрүм токойдо 13 жана 16 жаштагы эки кызга кол салып, аларды балка менен урган.

Маалыматка ылайык, кол салган адам жабырлануучулардын башына бир нече жолу сокку уруп, андан соң кылмыш болгон жерден качып кеткен. Жабырлануучуларга медициналык жардам көрсөтүлүп, андан ары дарылоо үчүн ооруканага жеткирилди.

Бул окуя боюнча эки адамды өлтүрүүгө аракет кылуу беренеси (РФ Кылмыш-жаза кодексинин 30-беренесинин 3-бөлүгү, 105-беренесинин 2-бөлүгүнүн «а» пункту) боюнча кылмыш иши козголду. Тергөө Домодедово шаардык прокуратурасынын көзөмөлүндө.

Шектүү убактылуу кармоочу жайга киргизилип, аны менен бирге тергөө амалдары жүргүзүлүүдө.