Өзгөндөгү борбордук стадиондун курулушу аяктап калды

Ош облусунун башчысы Элчибек Жантаев иш сапары менен Өзгөн районуна барып, бир катар социалдык жана инфраструктуралык объекттердин абалы менен таанышып чыкты. Бул тууралуу президенттин Ош облусундагы өкүлчүлүгү билдирди.

Сапардын алкагында облус жетекчиси Өзгөн шаарында курулуп жаткан борбордук стадиондун курулуш иштерин көрүп, курулуш компаниянын өкүлдөрүнөн долбоордун жүрүшү боюнча маалымат алды.

Анда белгиленгендей, учурда стадиондо футбол талаасынын жана эски тосмолордун демонтажы жүргүзүлүп, жаңы чуркоо жолдору, волейбол аянтчасы, ажатканалар, жуунуучу жайлар жана медициналык пункт курулууда. Көрүүчүлөр үчүн жаңы отургучтар орнотулуп, талаага түнкү жарыктандыруу жабдуулары орнотулууда. Стадиондун айланасы тосмолонуп, кошумча автоунаа жолу да салынды. Мындан тышкары, жалпы көлөмү 10 тоннаны түзгөн суу резервуарларынын курулушу толугу менен аяктаган.

Муну менен катар Элчибек Жантаев стадионго жанаша жайгашкан "Орто-Коргон" паркындагы курулуш иштеринин жүрүшү менен да таанышып, бардык жумуштарды белгиленген мөөнөттө жана жогорку сапатта бүтүрүү боюнча жооптуу жетекчилерге тапшырмаларды берди.