Армения Зангезур коридорун АКШнын көзөмөлүнө өткөрүү тууралуу маалыматты четке какты

Армения Зангезур коридору боюнча АКШга көзөмөл берүү тууралуу маалыматты четке какты. Бул тууралуу Пашеняндын басма сөз катчысы Назели Багдасарян Armenpress агенттигине билдирди.

Багдасарянга АКШнын Түркиядагы элчиси Том Барак эгер бул Армения менен Азербайжандын ортосундагы туңгуюкка такалган сүйлөшүүлөрдү жылдырып кетүүгө жардам берсе, анда АКШ Зангезур коридорун 100 жылга башкарууга алууга даяр экенин айткан.

«Армения өзүнүн суверендүү аймагын башка бир тарапка башкарууга өткөрүү маселесин талкуулаган да эмес, талкуулабайт да. Армениянын бир да аймагы өлкөнүн аймактык бүтүндүгүнөн, суверенитетинен тышкары болбошу керек», — деп белгилеген Багдасарян.

Анын айтымында, Армениянын мыйзамдары боюнча аймакты ижарага берүү жөн гана айыл чарба багытындагы жерлер үчүн мүмкүн.

Зангезур коридору — бул Азербайжандын негизги бөлүгүн Нахичеван автономиялуу республикасы менен байланыштырган транспорттук жол. Бул маршрут Армениянын түштүгүндөгү Сюник облусунан өтүп, болжол менен 40 чакырымды түзөт.

Армения бул долбоорду «Зангезур коридору» деп атаганга каршы болуп, аны өлкөнүн аймактык бүтүндүгүнө коркунуч катары көрөт. Өз кезегинде Азербайжан Армения бул жол аркылуу бош жана үзгүлтүксүз транзитти камсыз кыла албай жатканын айтып, коридорду эл аралык көзөмөлгө алууну талап кылууда.