Ош облусу бодо малды жасалма жол менен уруктандыруу үчүн жабдыктарды сатып алды

Бүгүн, 24-июлда Ош облусу Дүйнөлүк банктын "Туруктуу агрокластерлерди өнүктүрүү" долбоорунун алкагында бодо малды жасалма жол менен уруктандыруучу 34 жаңы пунктту жабдуулар менен камсыздады. Бул тууралуу облус жетекчилигинин маалымат кызматы билдирди.

Маалым болгондой, иш-чарага президенттин Ош облусундагы өкүлүнүн биринчи орун басары Курбанбек Айтибаев катышып, айыл аймак башчыларына жабдууларды тапшырды.

"Жаңы пункттар үчүн ар бир жабдуулар комплектине Дьюар идиши, шприц катетери, термостат-дефростер жана термометр кирет. Ар бир комплекттин баасы 37 миң 500 сом, жалпы 160 комплектке 6 миллион сом сарпталды. Мындан тышкары, уруктандыруучу техниктерге атайын формалар берилди. Жабдуулар айыл өкмөттөрдүн жана мэриялардын балансына болуп, тиешелүү адистерге убактылуу колдонууга берилет. Техник кызматын токтоткон учурда, жабдуу аймактык ветеринардык кызматтын макулдугу менен башка адиске өткөрүлөт. Иш-чара жасалма уруктандыруу кызматын кеңейтүүгө жана мал чарбасын өнүктүрүүгө багытталган",- деп белгиленет маалыматта.

Саамалык Агробизнестин атаандаштыкка жөндөмдүүлүгү борбору тарабынан Суу ресурстары, айыл чарба жана кайра иштетүү өнөр жайы министрлиги менен биргеликте ишке ашырылууда.