Супер фактылар: Венеция – суунун үстүндөгү сырдуу шаар

Венеция – дүйнө жүзүндөгү эң өзгөчө жана романтикалуу шаарлардын бири. Ал Италиянын түндүгүндө, Адриатика деңизи менен чектеш жерде жайгашкан. Өзүнүн архитектурасы, маданий мурастары жана каналдары менен ал дүйнөдөгү эң уникалдуу шаарлардын катарында турат. SUPER.KG порталынын "Супер фактылар" рубрикасында Венеция тууралуу эң таң калыштуу жана кызыктуу фактылар менен таанышабыз.

1. Шаар 118 аралдан турат

Венеция лагунада жайгашкан жана 118 чакан аралдан куралган. Алар бири-бирине 417 көпүрө менен байланышат. Бул көпүрөлөрдүн көбү таштан, айрымдары жыгачтан салынган. Жөө адамдар жана кайыктар гана жүрө алат.

2. Пайдубалы жыгач устундардан

Шаар баткак жерге курулгандыктан, курулушчулар миллиондогон жыгач устундарды сазга кагып, алардын үстүнө таштан имараттарды тургузушкан. Кызыгы, бул жыгачтар суу астында чирибейт — себеби абанын кирүүсү жок болгондуктан алар таштай катуу болуп сакталып турат.

3. Унаасыз жашоо

Венецияда автоунаалар, мотоциклдер, автобустар жок. Шаардын ичинде бир гана жөө басып же кайык менен жүрө аласың. Жада калса "Тез жардам", өрт өчүрүүчү, жүк ташуучу унаалар да — баары кайыктар болуп саналат.

4. Гондолалар — тарыхы 1000 жыл

Гондола — Венециянын символу. Бүгүнкү күндө гондола туристтерди сейилдетүү үчүн колдонулат. Бирок тарыхта ал шаардыктардын негизги транспорту болгон. Ар бир гондоланын узундугу 11 метрге жетсе, эни 1,4 метр. Салмакты теңдөө үчүн гондоланын бир тарабы узунураак болуп курулат.

5. Суунун көтөрүлүшү

Жылдын айрым мезгилдеринде деңиз деңгээли жогорулап, Венециянын аянттары, көчөлөрү толугу менен суу астында калат. Бул көрүнүштү жергиликтүүлөр “Acqua Alta” же “жогорку суу” деп аташат. Айрыкча Сан-Марко аянты эң биринчи суу алдында калат.

6. Сан-Марко аянты жана базиликасы

Сан-Марко аянты – Венециянын жүрөгү. Бул жерде жайгашкан Сан-Марко базиликасы – алтын жалатылган күмбөздөрү, мозаикалары жана кылымдар бою жыйналган изилгис байлыгы менен дүйнөгө таанымал.

7. Маска жана карнавал шаары

Ар жылы февраль айында өтүүчү Венеция карнавалы — дүйнөдөгү эң кооз майрамдардын бири. Жергиликтүү тургундар жана туристтер жомоктогудай кийимдерди кийип, ар түрдүү маскаларды тагынышат. Бул салт XIV-кылымдан бери уланып келет.

8. Венецияда түрмө көпүрөсү бар

Үшкүрүк көпүрөсү (Bridge of Sighs) — абдан белгилүү тарыхый көпүрө. Бул көпүрө менен сот залынан түрмөгө кетип бара жаткан адамдар акыркы жолу Венецияны көрүп, терең үшкүрүнгөндүктөн ушундай аталыш калган.

9. Тынчтык өкүм сүргөн өлкө

Венецияда унаа, кыйкырык, сигналдар жок болгондуктан, шаар өзгөчө тынч жана жай турмушта өкүм сүрөт. Ал жакка барган адамдарга убакыт токтоп калгандай сезим калтырат. Суунун шылдырдаганы, гондоланын сүзгөнү — бул шаардын күнүмдүк “музыкасы”.

10. Жоголуп бара жаткан мурас

Климаттын өзгөрүшү, деңиз деңгээлинин жогорулашы жана туристтердин көптүгү Венецияны тобокелге салып жатат. Бириккен Улуттуар Уюму, ЮНЕСКО Венецияны корголууга муктаж мурастар тизмесине кошууну сунуш кылган.

Венеция — бул жөн эле шаар эмес, бул адамзаттын суу үстүндөгү фантазиясы, архитекторлордун эрдиги жана маданияттын кайталангыс керемети. Ага бир жолу барып келген адам, кайтып барууну самайт.