Улуу Британиянын өкмөтү Газа маселеси боюнча чукул чогулат

Улуу Британиянын премьер-министри Кир Стармер бул жумада өкмөт мүчөлөрүн чукул жыйынга чакыра турганы кабарланды. Жайкы эс алууда жүргөн министрлер 1-сентябрга чейин тыныгууда болушса да, Газа тилкесиндеги оор кырдаалды талкуулоо үчүн кайра чогулат. Бул тууралуу чет элдик басылмалар жазышты.

Маалым болгондой, премьер-министрге Палестина мамлекетин таанууга чакырган басымдар күчөп жаткан шартта бул маселени талкуулоо өзгөчө мааниге ээ. Өкмөт буга жооп катары Жакынкы Чыгыштагы кризисти чечүү боюнча жаңы кадамдарды иштеп чыгат.

Стармер бүгүн Шотландияда АКШ президенти Дональд Трамп менен жолугушуп, анда да Газанын маселеси күн тартибине коюлары күтүлүүдө.

Газа тилкесинде учурда оор гуманитардык абал өкүм сүрүүдө. Израилдин катуу чабуулдары жана аймакты курчоосу аймакка жардам жеткирүүгө олуттуу тоскоол болуп жатат. Жергиликтүү маалыматтарга караганда, аймакта суу, дары-дармек, медициналык жабдуулар жана гигиеналык каражаттар жетишсиз. Өзгөчө балдар арасында ачарчылыктан улам өлүм учурлары көбөйдү. Бүгүнкү күндө Газа тилкесинде ачкачылыктан каза болгон палестиналыктардын саны 133 кишиге жеткени кабарланды.

Кырдаал начарлагандыгына байланыштуу Бириккен Араб Эмираттары менен Иордания Газага аба аркылуу гуманитардык жардам жөнөтө башташты.