Кулак-мурду кесилген Асел Ногойбаеванын кулагына операция жасалды

Мурдагы күйөөсү тарабынан кулак-мурду кесилген Асел Ногойбаеванын кулагына операция жасалды. Бул тууралуу ал өзүнүн социалдык тармактагы баракчасында билдирди.

"Бүгүн менде бакыттын көз жашы болуп жатат. Менин дарыгерим Кыргызстандан келе жатып, сөйкө ала келишимди айткан. Бирок мен алган эмесмин. Оюмда сөйкө такпай, кулагымды чачым менен жаап, бекитип жүрөм деп ойлогом. Бирок кулагым мен ойлогондон да сонун болду",-деп жазды ал.

Буга чейин Ногойбаева социалдык баракчасына сүрөт жүктөп, учурдагы абалы боюнча билдирүү тараткан.

Эске салсак, 2023-жылы 20-сентябрда Бишкектин четиндеги Селекция айылында 36 жаштагы Асел Ногойбаеваны мурдагы күйөөсү мыкаачылык менен бычактап, келин ооруканага түшкөн. Милиция мурдагы аялын бычактоого шектелген 39 жаштагы жаранды кармаган. Шектүү аялынын мурдун, кулактарын кесип салган.

Былтыр 26-январда Чүйдүн Сокулук райондук соту Азамат Эстебесовду коюлган 11 айыптын ичинен 10 айып боюнча күнөөлүү деп таап, 20 жылга эркинен ажыраткан.