84 адам Мароккодон Испанияга сүзүп өттү

Испаниянын Түндүк Африкадагы жери болгон Сеутага Мароккодон сүзүп кирүүгө аракет кылган 84 мигрант камерага түшүп калган. Алардын көбү Европа биримдигинин аймагына жетүүгө үлгүрүшкөн. Бул тууралуу чет элдик басылмалар жазышты.

Испаниянын коомдук телеканалы RTVE тараткан видеолордон, 54 бала жана 30 чоң киши толкундуу деңизди сүзүп өтүп, Сеутага жетүүгө аракет кылганы көрүнөт. Сивил Гвардиясы (жарандык коргонуу кызматы) айрымдарын кайыктар менен куткарган, бирок көпчүлүгү өз алдынча сүзүп жеткен.

Сеута бийлиги бул мигранттарды убактылуу жайгаштыруу борборлоруна алып барган. Бирок аймактын жетекчилиги мигранттардын басымы күчөп жатканын айтып, Мадридден колдоо сурады.

"Бизди жалгыз таштабагыла. Бул мамлекеттин маселеси жана чечилиши керек",- деди Сеута аймагынын өкүлү Хуан Ривас.

Эске салсак, 2023-жылдын 26-августунда да жүздөгөн мигрант туманды пайдаланып, Сеутага сүзүп жетүүгө аракет кылган. Ал эми 2021-жылы бир бала пластик бөтөлкөлөргө жармашып сүзүп өтүүгө аракет кылганы элдин көңүлүн бурган.

Испаниянын миграциялык саясаты эгер Мароккодон келген мигрант жаш бала болбосо же башпаанек сурабаса, алар дароо кайтарыларын айтты. Ал эми башка өлкөлөрдүн жарандары бир нече күнгө убактылуу борборлорго жайгаштырылгандан кийин бошотуларын кошумчалады.

Премьер-министр Педро Санчес жетектеген өкмөт 2021-жылдан бери 700 миңге жакын мыйзамсыз мигрантка мыйзамдуу макам берген. Бул мигранттар айыл чарбада, курулушта, туризмде жана саламаттык сактоо тармагында жумушчу күчүнүн жетишпегенин толукташат. Бирок өлкөдөгү 10 пайыз жумушсуздук деңгээли жана миграция саясаты айрым жарандар арасында сынга алынууда.