Израилдин кадамын укук коргоо уюмдары палестиналыктарга каршы геноцид деп айыптоодо

Израилдин "Бецелем" жана "Адам укуктары үчүн дарыгерлер" аттуу укук коргоо уюмдары өлкө бийлигинин кадамын палестиналыктарга каршы геноцид деп айыптап, өзүнчө билдирүүлөрдү таратышты.

"Израилдин Газа тилкесиндеги саясатын жана алардын үрөй учурган кесепеттерин талдоо, ошондой эле жогорку даражалуу саясатчылардын, аскер командирлеринин чабуулдун максаттары жөнүндө билдирүүлөрү, өлкөнүн Газа тилкесиндеги палестиналык коомду жок кылуу үчүн координацияланган, атайылап иш-аракеттерди жасап жатат деген айкын корутундуга алып келет",- деп белгиленген уюмдун маалыматында.

"Бецелем" уюмунун өкүлдөрү мындай аракет Газадан тышкаркы аймактарга да колдонулушу мүмкүн деп тынсыздануусун билдирди.

"Адам укуктары үчүн дарыгерлер" өз кезегинде Израил бийлиги ооруканаларды, медициналык жабдууларды жок кылуу, дары-дармектердин жетишсиздигин жана массалык ачарчылык үчүн шарттарды түзүү аракетин көрүп жаткандыгын белгилеп, муну геноцид деп эсептесе боло тургандыгын билдирди.