Камбоджа ок атышууну токтотуу келишимин бузбаганын билдирди

Камбоджа Таиланд менен болгон ок атышууну токтотуу келишимин бузду деген айыптоолорду четке какты. Бул тууралуу чет элдик басылмалар жазышты.

Камбоджанын расмий өкүлдөрү билдиришкендей, өлкө эч кандай аскердик чагымчылдыкка жол берген эмес жана Таиланд менен түзүлгөн ок атышууну токтотуу келишимин толук урматтап келет.

Бул билдирүү Таиланд тараптан айтылган дооматтардан кийин жасалды. Буга чейин Таиланддын өкүлдөрү Камбоджаны чек ара аймагында артиллериялык ок чыгарды деп айыпташкан.

Камбоджанын коргоо министрлиги тараткан билдирүүдө: "Биз ок атышууну токтотуу келишимин бузган эмеспиз. Камбоджанын Куралдуу күчтөрү өз чек араларынын ичинде гана иш алып барууда жана провокациялык аракеттерге барбайт",- деп айтылды.

Ошондой эле Камбоджа таиланддык тарапты дипломатиялык каналдар аркылуу маселени чечүүгө чакырып, жаңжал чыгаруучу билдирүүлөрдөн карманууга үндөдү.

Эксперттердин айтымында, чек ара аймагында чыңалуунун жогорулашы 2010-жылдардагы Преах-Вихеар храм айланасында болгон аскердик кагылышууларды эске салууда. Ошондуктан эки тарап тең азыр кырдаалды дипломатия жолу менен жөнгө салууга кызыкдар болушу керек.

Эске салсак, 24-июлда эки өлкөнүн чек арасында чыр башталгандан бери, кеминде 33 аскер жана жай тургун каза болуп, Таиланд менен Камбоджанын миңдеген жарандары өз үйлөрүн таштап кетүүгө аргасыз болушкан. Кечээ, 28-июлда аталган эки өлкө Малайзияда тынчтык сүйлөшүүлөрүн жүргүзүштү.