Орусияда теракт уюштурууга шектүү катары Борбордук Азиянын жараны кармалды
Ростов-на-Донуда Орусиянын Федералдык коопсуздук кызматы теракт уюштурууга шектүү адамды кармады. Бул тууралуу бүгүн, 29-июлда орус басылмалары жазышты.
Маалыматка ылайык, мекеме Украинанын атайын кызматтарынын тапшырмасы менен теракт даярдап жаткан Борбордук Азия өлкөлөрүнүн биринин жараны, 1982-жылы туулган адамды кармаган. Ал Орусиянын жогорку даражадагы аскер кызматкерине кол салууну пландаган.
Текшерүү маалында кармалган адамдан 400 граммдык колдон жасалган бомба табылган. Мекеме билдиргендей, учурда шектүү күнөөсүн мойнуна алып, көрсөтмө берип жатат.
Бул факт боюнча шектүүгө "Террордук актка даярдануу", "Жарылуучу заттарды мыйзамсыз сактоо жана ташуу" жана "Жарылуучу заттарды мыйзамсыз жасоо" беренелери боюнча кылмыш иши козголду. Учурда шектүү камакка алынганы айтылды.
