Окумуштуулар: Бактылуу түгөйлөр соцтармакка бирге түшкөн сүрөттөрүн аз жүктөшөт

Окумуштуулар бактылуу түгөйлөр интернеттеги социалдык тармактарга бирге түшкөн сүрөттөрүн башкаларга салыштырмалуу аз жарыялай турганын далилдешти. Бул тууралуу чет элдик басылмалар жазышууда.

Shotkit кызматы тарабынан 18 жаштан 50 жашка чейинки 2000 түгөй катышкан масштабдуу сурамжылоо аркылуу илимпоздор соцтармактагы бактылуулук менен көнүмүш адаттын байланышын түшүнүүгө аракет кылышкан.

Социалдык тармактарды активдүү колдонгон түгөйлөрдүн 10 пайызы гана өздөрүн абдан бактылуу деп аташкан. Бирок бактылуу адамдардын дээрлик жарымы, тагыраагы 46 пайызы купуялуулукту баалайт. Ошол эле маалда жумасына үч же андан көп биргелешкен сүрөт жарыялаган түгөйлөр өнөктөштөрү менен сүрөттөрүн азыраак жарыялагандарга караганда 128 пайыз бактысыз экени белгилүү болгон.

Эксперттер бул тенденцияны ишенич менен байланыштырышат. Адам өзүнүн мамилесин ачык көрсөтүүгө канчалык аракет кылса, демек, анда ошончолук ички ишенимсиздик жана жакын адамын жоготуп алуу коркунучу бар экенин билүүгө болот.