The Daily Mail: ФБРде Эпштейн өлгөн түнү абакта тартылган видеожазуу бар

ФБР жана АКШнын Юстиция министрлиги 2019-жылы августта сексуалдык кылмыштар үчүн соттолгон америкалык финансист Жеффри Эпштейн өлгөн түндүн видеожазуусун таап алышты. Бул тууралуу Daily Mail басылмасы маалымдады. Бул видеоматериал Metropolitan Correctional Center түрмөсүндө орнотулган күзөт камераларынан алынган.

Мурда бул видеожазуунун бир бөлүгү кадрлардын алмашуусунан улам жок болуп калган деп айтылып келген, ал процесс ар бир түндө кайталанып турган. Бирок азыркы маалыматтарга караганда, тергөөчүлөргө кечки саат 12ге жакын убакта тартылган ошол жоголгон бир мүнөттүк видеону алууга мүмкүнчүлүк түзүлгөн.

Инвестициялык банкир Жеффри Эпштейн 2008-жылы катаал кылмыштарга, анын ичинде 14 жаштагы кызды зордуктоого байланыштуу айыпталып соттолгон. Ал 2019-жылдын жайында кайра кармалган жана кыз-келиндерди, анын ичинде 14 жаштагы балдарды сексуалдык кулчулукка мажбурлаганы үчүн айыпталган. Ал 2019-жылдын августунда сот процесси учурунда өз жанын кыйган.

Эпштейндин кардарлары арасында таасирдүү саясатчылар жана ишкерлер болушу мүмкүн экени айтылып келет. Алардын арасында Илон Маск, Билл Гейтс, Билл Клинтон жана Эндрю ханзаада да бар.

2019-жылдын июль айында Юстиция министрлиги Эпштейндин камерасына алып бараткан жолдун 11 сааттык видеожазууларын жарыялаган. Бул жазуулар аны өлтүрүү тууралуу пикирлерди четке кагуу үчүн даярдалган.

2023-жылдын 6-июлунда Юстиция министрлиги менен ФБР биргелешкен меморандумунда Эпштейн өлтүрүлбөгөнүн тастыктаган. Мындан тышкары, документте "кардарлардын тизмеси" же жаңы айыпталуучулардын жоктугу тууралуу айтылган.

АКШ президенти Дональд Трамп сексуалдык куугунтукка кабылган балдар маселесиндеги Эпштейндин ишине байланыштуу бир бөлүк документтерди ачыкка чыгарууну Пэм Бондиге тапшырган. Ак үй бул маселеде маалыматтарды жашырып жатканы үчүн сындалган.