Камчаткада бир сааттын ичинде жети жолу жер титиреди

Кечээ, 30-июлда кечке маал Камчаткада бир сааттын ичинде жети жер титирөө катталып, эң күчтүү эки жер титирөөнүн күчү 6 баллга жетти. Бул тууралуу Орусиянын Илимдер академиясынын бирдиктүү геофизикалык кызматынын Камчаткадагы филиалы билдиргенинин жергиликтүү басылмалар жазышууда.

Кызматтын маалыматы боюнча, күчү 6 баллга жеткен биринчи жер титирөө Петропавловск-Камчатскийден 402 чакырым алыстыкта болгон. Жер титирөөнүн очогу 33 чакырым тереңдикте жайгашты. Бир саатка жетпеген убакыттан кийин катталган экинчи силкинүү дагы шаардан дал ошондой алыстыкта жайгашып, очогу 77 чакырым тереңдикте болду.

Адистер аймактагы сейсмикалык активдүүлүккө мониторинг жүргүзүүнү улантышууда.

Белгилей кетсек, кечээ,30-июлда Камчаткада күчү 8,7 баллга жеткен катуу жер титирөө болгон. Авача булуңунун жээгинде цунами коркунучу жарыяланып, Сахалин облусунун Северо-Курильский районунда жана Петропавловск-Камчатскиде өзгөчө кырдаал жарыяланды. Учурда цунаминин кесепеттери жоюлууда.