Садыр Жапаров Чолпон-Атада Өзбекстандын тышкы иштер министрин кабыл алды (фото)

Президент Садыр Жапаров бүгүн, 31-июлда Өзбекстандын тышкы иштер министри Бахтиёр Саидовду Чолпон-Ата шаарында кабыл алды. Бул тууралуу президенттин басма сөз кызматы билдирди.

Жолугушуунун жүрүшүндө бардык негизги тармактардагы, анын ичинде экономика, инвестиция жана маданият жаатында эки тараптуу кызматташуу маселелери каралды. Камбарата -1 ГЭСин жана "Кыргызстан-Кытай-Өзбекстан" темир жолун куруу биргелешкен долбоорлорунун алкагында өз ара аракеттенүүгө өзгөчө көңүл бурулду.

Мамлекет башчысы боордош элдерди кылымдар бою жалпы тарыхы, маданий жакындыгы жана жалпы баалуулуктары бириктирип келгенин баса белгиледи. Бул контекстте Өзбекстандын тышкы саясий мекемесинин башчысынын расмий сапары – өлкөлөр ортосундагы стратегиялык өнөктөштүктүн жана бир туугандык мамилелердин жогорку деңгээлинин дагы бир ачык далили экенин белгиледи.

Өз кезегинде Бахтиёр Саидов Өзбекстандын президенти Шавкат Мирзиёевдин саламын жана эң жакшы каалоолорун айтты.

Ошондой эле Өзбекстандын тышкы иштер министри мамлекет башчылары тарабынан коюлган милдеттерди ишке ашыруу үчүн бардык күч-аракетин жумшоого даярдыгын ырастады.

Соңунда Садыр Жапаров Өзбекстандын президенти Шавкат Мирзиёевге жылуу салам жолдоп, Өзбекстандын тышкы иштер министри Бахтиёр Саидовго анын жооптуу мамлекеттик ишмердүүлүгүнө ийгиликтерди каалады.