Кара-Кулжадагы келиндин өлүмү: Жолдошу 18 жылга эркинен ажыратылды

Ош облусуна караштуу Өзгөн райондук сотунда Айзирек Эралиеванын өлтүрүлүшүнө байланыштуу иш каралып, айыпталып жаткан жолдошу 18 жылга эркинен ажыратылды. Бул тууралуу бүгүн, 31-июлда Жогорку соттун басма сөз кызматы билдирди.

Маалым болгондой, Өзгөн райондук сотунун 31-июлдагы өкүмү менен А.Б. Кылмыш-жаза кодексинин 122-беренесинин 2-бөлүмүнүн 3-пункту (Адам өлтүрүү), 267-беренесинин 1-бөлүмү, 267-беренесинин 2-бөлүмү (Мыйзамсыз ок атуучу курал-жаракты, ок-дарыларды сактоо жана алып жүрүү) менен күнөөлүү деп табылды. Ага эсептик көрсөткүчтүн негизинде мыйзамсыз курал жарактарды колдонгону үчүн 100 миң сом айып салынып, 18 жылга эркиндигинен ажыратылды.

Белгилей кетсек, 26-майда Ош облусунун Кара-Кулжа районунда каргашалуу окуя катталып, 38 жаштагы аял өмүрлүк жолдошунун колунан ажал тапканы маалым болгон. Шектүүгө "Адам өлтүрүү", "Куралды, ок-дарыларды мыйзамсыз жүгүртүү" беренеси менен кылмыш иши козголгон.

Эралиеванын жакындары анын өмүр бою эркинен ажыратылышын талап кылышты.