Кызыл-Кыя мэриясындагы коррупция фактысы боюнча кылмыш иши козголду

Улуттук коопсуздук мамлекеттик комитети Кызыл-Кыя шаарынын мэриясына караштуу Муниципалдык кызмат башкармалыгында коррупция фактысы боюнча кылмыш ишин козгогонун билдирди.

Маалыматка ылайык, мамлекеттик жана муниципалдык органдардагы коррупциялык көрүнүштөрдү аныктоо жана алдын алуу иш-чараларынын алкагында аталган мекеменин айрым кызмат адамдары тендердик долбоорлорду ишке ашыруу процессинде мыйзам бузган.

Тергөөнүн жүрүшүндө тендерлерди уюштуруу, өткөрүү жана контракттарды берүүдө мыйзам талаптары сакталбаганы, айрым компанияларга атайылап артыкчылык берилип, мамлекеттик каражатты натыйжасыз пайдалануу фактылары аныкталган.

Учурда тиешелүү экспертизалар дайындалып, тергөө иштери жүрүп жатат. Кылмыш иши Кыргыз Республикасынын мыйзамдарына ылайык каралат.

УКМК коррупциялык фактылар боюнча ишти толук ачык жана калыс тергөө менен мамлекеттик каражаттын мыйзамсыз колдонулушуна бөгөт коюларын белгиледи.