Ысык-Көл милициясы славян тектүүлөрдүн мүрзөсүндөгү бузулган эстеликтер боюнча үн катты

Бүгүн, 4-август Ысык-Көл районунда жайгашкан славян тектүүлөрдүн мүрзөсүндөгү эстеликтердин бузулушу боюнча облустук милиция үн катты.

Анда айтылгандай, окуя Бактуу-Долоноту айылынын түндүк тарабындагы мүрзө аймагында орун алган. Ал жерде бир нече кайчылаш темир жана жыгач эстеликтер сынып, жулунган абалда табылган.

"Ыкчам иликтөө иштеринин негизинде 2014-жылы туулган Т.А., Т.У., С.А. жана 2015-жылы туулган А.Э. аттуу төрт жашы жете элек бала бул аракетке тиешеси бар экендиги аныкталган. Алар ата-энелеринин коштоосунда РИИБге жеткирилип, түшүндүрмө берилди. Өспүрүмдөр ата-энелеринин катышуусундагы сурак учурунда бул аракеттерди ойноп жасап жиберишкенин билдиришти. Иликтөөнүн жүрүшүндө улуттар аралык кастыкты козутуу же диний жек көрүүчүлүккө байланыштуу кандайдыр бир белгилер аныкталган жок", - деп айтылат маалыматта.