Эми кыргызстандыктар салыктар кайда кетип жатканын көрө алышат (видео)

Эми кыргызстандыктар салыктар кайда кетип жатканын ачык көрө алышат. Бул тууралуу бүгүн, 5-августта Салык кызматынан билдиришти.

Мамлекеттик салык кызматынын алдындагы "Салык сервис" мамлекеттик мекемеси жарандардын төлөмдөрүн кантип инфратүзүмгө же социалдык колдоого айланганын көрсөткөн интерактивдүү сервисти ишке киргизди.

"Төмөнкү шилтемеге (https://my.salyk.kg) кирип, атыңызды жана төлөнгөн салыктын суммасын жазуу керек. Андан кийин ошол акчага эмнелерди жасаса болорун, тактап айтканда, жөлөкпул төлөөдөн же бала бакчанын курулушунан баштап, "Тез жардам" унааларын алууга чейинкини көрө аласыз",- деп айтылат маалыматта.

Салык кызматы жарандарды жаңы кызматты сынап көрүүгө жана анын жыйынтыгын социалдык тармактарда бөлүшүүгө чакырат. Долбоордун максаты - салыктарды колдонуунун ачыктыгын жогорулатуу жана фискалдык тартипке аң-сезимдүү мамилени калыптандыруу экени айтылды.

Салык кызматынын өкүлүнүн айтымында, сервис элге алардын өлкөнүн өнүгүшүнө кошкон салымынын ролун жакшыраак түшүнүүгө жана муктаж болгондорго колдоо көрсөтүүгө шарт түзөт.