Европа Биримдиги Израилдин "E1" планына нааразылык билдирди

Европа Биримдиги (ЕБ) Израил бийлигинин "E1" аттуу мыйзамсыз конуш куруу планын илгерилетүү чечими эл аралык укукту бузуп, эки мамлекеттүү чечим мүмкүнчүлүгүн ого бетер алсыратаарын билдирди.

ЕБнин тышкы иштер жана коопсуздук саясаты боюнча жогорку өкүлү Кая Калластын кеңсесинен таратылган билдирүүдө, Израилдин каржы министри Безалел Смотричтин оккупациядагы Чыгыш Иерусалимде палестиналыктардан тартып алынган аймактардагы конуштарды кеңейте турган "E1" долбоорун жактырууга ниеттенгени айыпталды.

"Бул чечим ишке ашса, аталган аймактагы курулуш Чыгыш Иерусалим менен Батыш Иорданиянын ортосундагы аймактык байланышты түбөлүк жоготот жана Батыш Иорданиянын түндүгү менен түштүгүнүн ортосундагы байланыш үзүлөт", - деп жазылат билдирүүдө.

ЕБ Израилди конуш курууну токтотууга чакырып, бул чечимден баш тартууга үндөдү жана эки мамлекеттүү чечимдин ишке ашуусун камсыз кылуу үчүн аракет көрүү зарылдыгын белгиледи.

Израил министри Смотрич буга чейин "E1" долбоорун жактыраарын жана "Палестина мамлекети идеясын жок кылуу" ниетин ачык айткан. Израилдин Жогорку пландаштыруу кеңеши бул планды 20-августта карап, 3 401 мыйзамсыз турак үй курууга акыркы бекитүү бериши күтүлүүдө.