Кызматкерлердин иштен бошоо тартибин жөнгө салууну жакшырта турган мыйзам долбоору иштелип чыкты

Жогорку Кеңеште кызматкерлердин иштен бошоо тартибин жөнгө салууну жакшыртууга багытталган “КРнын Эмгек кодексине толуктоо киргизүү жөнүндө” мыйзам долбоору каралып, биринчи окууда добуш берүүгө жөнөтүлдү.

Мыйзам долбоорунун демилгечилеринин бири депутат Нуркамил Мадалиевдин айтымында, кызматтан бошотулган адамдардын басымдуу бөлүгү сот аркылуу кызматына кайра орношуп, бош жүргөн мезгили үчүн ири өлчөмдөгү эмгек акыларын өндүрүп алуу менен мамлекеттик бюджетке чоң чыгым келтирүүдө. Ошондон улам ушундай чыгымдарды мыйзамыз кызматтан бошоткон жумуш берүүчүнүн жеке өзүнөн төлөтүү зарылдыгы келип чыкты. Ошондо гана мамлекеттик бюджет чыгымга учурабайт, мыйзамсыз кызматтан бошотуулардын саны да азаймакчы.

Депутат Курмантай Абдиев мындай жобого этият мамиле кылуу керек экенин эскертти. Анткени мыйзамдуу бошотулган кээ бир жарандар сот аркылуу кайра кызматка келип жаткан учурлар да жок эмес. Анда аны кызматтан бошоткон жетекчи жөн жерден эле чыгым тартып калууда. Юстиция министри Алмамбет Шыкмаматов депутаттын мындай пикирин колдоду. Ал жетекчилер иш тартибин бузган кызматкерлерди бошото албай каларын айтат. Ал эми Анвар Артыков баш болгон бир катар депутаттар мыйзам долбоорун колдой турганын билдирди.

Мыйзам долбоору биринчи окууда добуш берүүгө жиберилди.