Банктар аралык процессинг борбору "Элкарт+" картасын ишке киргизди

Банктар аралык процессинг борбору Кыргызстандын Улуттук төлөм системасынын колдонуучулары үчүн жаңы функционалдуу "Элкарт+" картасын сунуштады.

Негизги жаңылык – бул "Элкарт+" продуктунун алкагында банк өнөктөштөрү тарабынан берилүүчү бонустар жана артыкчылыктар.

“Элкарт+” физикалык жана виртуалдуу түрүндө жеткиликтүү, онлайн төлөмдөрдө да колдонулуп, транзакциялар күчөтүлгөн коргоодо болот. Ошондой эле заманбап, стилдүү дизайнга да ээ. Карта “Элкарт мобайл” тиркемеси менен шайкеш иштейт, ошону менен бардык “Элкарт” карталарын бирден башкарууга шарт түзөт.

Азырынча "Элкарт+" картасын эки банк — "Компаньон Банк" жана "Бакай Банк" аркылуу чыгарса болот. Жакын арада өнөктөштөрдүн тизмеси кеңейиши күтүлүүдө.

Банктар аралык процессинг борборунун өкүлдөрү билдиргендей, "Элкарт+" картасын ишке киргизүү — улуттук төлөм системасын өнүктүрүүнүн жаңы этабы болуп, Кыргызстандагы ар бир жарандын накталай эмес төлөмдөрүн дагы ыңгайлуу, коопсуз жана пайдалуу кылууга багытталган.