Трамп: "Украинадагы согушту токтотуу үчүн Путинге кайрылуунун убактысы келе элек"  

АКШнын президенти Дональд Трамп Орусиянын президенти Владимир Путинге Украина менен ок атышууну токтотуу сунушу менен кайрылууга азырынча эрте экенин билдирди. Бул тууралуу Bloomberg агенттиги жазып чыкты.

Журналисттердин “Путинге ок атышууну токтотууну кайрадан сунуш кыла турган учур келдиби?” деген суроосуна Трамп: "Менимче, азыр убактысы келе элек. Бирок туура учур келгенде, эгер мага андай кадам таштоого туура келсе — бул катуу жана чечкиндүү болот", – деди.

Трамп өз сөзүндө Путин анын ишеничинен чыкканын билдирди. Ал ошондой эле Вашингтондун союздаштарын орус мунайын сатып алууну токтотууга чакырды. Эгер алар АКШнын Кремлге басым көрсөтүүсүн жана жаңжалды токтотууга аракетин улантуусун каалашса, бул негизги кадам болушу керектигин белгиледи.

Анын пикиринде, мунайдын баасы түшсө, Путин жаңжалды жөнгө салууга аракет кылмак.

Буга чейин Трамп ушул жумада Орусия президенти Владимир Путин менен Украина президенти Владимир Зеленскийдин жолугушуусун уюштуруу маселесин “жакын арада” чечүүнү убада кылган.