Францияда нааразылык акциялары жана полиция менен кагылышуулар уланууда (видео)

Францияда өлкө боюнча өтүп жаткан нааразылык акцияларына бир миллиондон ашуун адам катышууда. Франциянын ар кайсы шаарларында жана аймактарында 250дөн ашык жүрүш жана акция уюштурулууда.

Алардын катарында мугалимдер, поезд айдоочулар, медицина кызматкерлери жана фармацевттер да бар экенин Radio France Internationale маалымдады.

Көптөгөн шаарларда орто мектептер убактылуу жабылды. Парижде башталгыч мектептердин мугалимдеринин басымдуу бөлүгү ишке чыгуудан баш тартышты. Демонстранттар өкмөттүн каржы саясатын кайра карап чыгып, социалдык муктаждыктарга бөлүнгөн каражатты көбөйтүүнү жана бай француз жарандарына салыктын жогорку ченин киргизүүнү талап кылышууда.

Акция маалында полиция менен кагылышуулар да болду. Акыркы маалыматтарга ылайык, 181 киши кармалып, 11 адам жаракат алды. Коопсуздукту камсыздоо үчүн 80 миңден ашуун полиция кызматкери тартылды. Алар бронетехника, суу бүрккүчтөр жана дрондорду колдонушууда.

Буга чейин Франция парламенти өкмөттүн чыгымдарын 44 миллиард еврого кыскартуу пландарынан улам премьер-министр Франсуа Байруну кызматтан кетирген. Азырынча жаңы дайындалган премьер-министр Себастьен Лекорню өзүнүн экономикалык программасын сунуштай элек.