Режиссёр Актан Арым Кубаттын "Кара Кызыл Сары" тасмасы "Оскар" сыйлыгына көрсөтүлөт

"Кыргызфильм" улуттук киностудиясында тартылган режиссёр Актан Арым Кубаттын "Кара Кызыл Сары" тасмасы “Оскар” сыйлыгына көрсөтүлөт. Бул чечимди кечээ, 18-сентябрда Кыргызстандын Оскар комитети чыгарды.

Маалыматка ылайык, тасма "Эң мыкты эл аралык көркөм тасма" наамына көрсөтүлөт.

Белгилей кетсек, аталган тасма жазуучу Топчугүл Шайдуллаеванын аңгемелеринин негизинде тартылган. Тасманын дүйнөлүк бет ачары 2025-жылдын июнь айында Шанхайдагы эл аралык фестивалда өтүп, "Эң мыкты тасма" сыйлыгына ээ болгон.

Учурда чет мамлекеттерде дагы атайын комитеттер сыйлыктын узун тизмесине киргизүү үчүн өз өлкөлөрүнүн атынан талапкерлерди тандап жатышат. Андан кийин академиянын тизмесин киноакадемиянын атайын калыстар тобу аныктайт. Кинолордун 2025-жылдагы жетишкендиктери үчүн 98-Оскар сыйлыгын тапшыруу салтанаты 2026-жылдын 15-мартында Лос-Анжелесте өтмөкчү.