Евробиримдик Орусияга карата 19-санкциялар пакетин жактырды

Евробиримдик Украинадагы аскердик аракеттерге байланыштуу Орусияга каршы жаңы санкциялар пакетин кабыл алды. Бул тууралуу Евробиримдик басма сөз катчысы Паула Пиньо билдирди.

Чет элдик басылмалардын маалыматы боюнча, бул Орусияга карата кабыл алынган 19-пакет болуп саналат.

Жаңы санкциялардын мазмуну азырынча расмий түрдө жарыялана элек. Еврокомиссиянын төрайымы Урсула фон дер Ляйен жана Европа Биримдигинин тышкы саясат боюнча жетекчиси Кая Каллас санкциялар тууралуу толук маалыматты 19-сентябрда берише тургандыгын билдиришти.

Санкциялар пакети даярдалып жаткан учурда ЕБ банктарга жана энергетикалык компанияларга карата чектөөлөрдү киргизиши мүмкүн экени айтылган. Ошондой эле италиялык ANSA агенттиги Европа өлкөлөрү орус жарандар үчүн виза эрежелерин катаалдатуу маселесин талкуулап жатышканын билдирген.