Жалал-Абаддагы "Кең-Сай – автожол" көзөмөл пунктунун Тайсон жана Кудаш аттуу "кыйындары" кармалды

Жалал-Абад облусунун Ноокен районундагы "Кең-Сай – автожол" көзөмөл-өткөрүү пунктунда иш алып барган кылмыштуу топтун ишине бөгөт коюлду. Бул тууралуу бүгүн, 20-сентябрда УКМКнын маалымат борбору билдирди.

Маалым болгондой, Т.А. (каймана аты Тайсон) жана анын иниси И.у.К. (Кудаш) атту жарандар аталган өткөрмө бекетте жеке ишкерлерге системалуу түрдө кысым көрсөтүп келишкен. Алар криминалдык идеологияга берилгендиктерин жар салып, өлкөнүн жогорку бийлик өкүлдөрү менен болгон тууганчылык байланыштары тууралуу жалган билдирүүлөрдү жасап, бажы жана чек ара кызматынын кызматкерлерин коркутуу менен көзөмөл-өткөрүү пунктунун жумушуна тоскоолдуктарды жаратышкан.

Мындан тышкары алардын Ноокен районунун чек ара аймагындагы аткезчилик иштерге (дары-дармектерди, тамеки буюмдарын, уюлдук телефондорду мыйзамсыз ташуу жана башка), ошондой эле Өзбекстандан келген эмгек мигранттарын мыйзамсыз негизде Бишкек шаарына ташууга тиешеси бар экендиги тууралуу маалымат алынды. Кармалган кылмышкерлер эмгек мигранттарын коркутуп, өздөрүнүн карамагында болгон таксилерге зордоп салып, алардан жол кире акысын чектен тыш жогорку баада талап кылышкан.

УКМК кармалгандардан жабыркагандарды 0995 012210 (WhatsApp) номуруна кайрылууга чакырат.