Кыргызстанда мугалимдер эми эки предметтен окутса болот

Кыргызстандагы мугалимдер эки предметти бир учурда окутууга болот. Бул тууралуу Илим министрлигинин өкүлү Хадича Шамбеталиева "Биринчи радионун" түз эфиринде билдирди.

"Буга чейин ЖРТдагы балл негизги критерий болсо, эми сапатка көңүл бурулуп жатат. Педагогикалык адистиктер үчүн ЖРТнын босого баллы жогорулатылды. Эми бир мугалим химия менен биологияны же физика менен математиканы бирге окутса болот", - деди ал.

Ошондой эле ал мугалимдик кесиптин кадыр-баркы өсүп жатканын белгиледи. Айрыкча айыл жерлеринде мугалим болууну каалагандардын саны көбөйгөн.

"Көптөгөн жаштар пенсия курагындагы мугалимдердин кетишин күтүп турушат. Мугалимдердин жетишсиздиги негизинен Бишкек шаарында сезилүүдө. Ал эми айыл жерлеринде мугалим болууга кызыккандардын кезеги көп. Ошондой эле биз мамлекеттик бюджеттик негизде окуган студенттерди да мектептерге тартуудабыз. Алар окуусун бүткөндөн кийин мамлекеттик мектептерде милдеттүү түрдө иштеп бериши керек. Эгерде иштебей коюшса, мамлекетке төлөп берген окуу акысын кайра кайтарып берүүгө милдеттүү болушат", - деп кошумчалады Шамбеталиева.