Гималай тоолорунда уюштурулган фейерверктер интернетте кызуу талкууланууда (видео)

Кытайдагы Гималай тоолорунда 19-сентябрда Arc’teryx кийим бренди менен сүрөтчү Цай Гоцяна биргеликте фейерверк шоусун уюштурушту. Бул иш-чара коомчулуктун катуу сын-пикирин жаратып, социалдык тармактарда талкуу жаратууда.

Chinadaily маалыматы боюнча, уюштуруучулар Шигадзе шаарынын Гьялзе аймагында, деңиз деңгээлинен болжол менен 5500 метр бийиктикте үч фейерверк уюштурган. Бул шоу “Учкан ажыдаар” аттуу арт-проекттин бир бөлүгү болгон. Шоунун видеосу 20-сентябрда интернетте тарап, колдонуучулардын нааразычылыгын жараткан. Колдонуучулар тоолуу аймактын экологиясына зыян келтирилгенин жана жергиликтүү маданиятка урмат-сый көрсөтүлбөй жатканын айтышкан.

Уюштуруучулар сынга жооп катары катуу көзөмөл алдында фейерверктер атылганын, экологиялык таза материалдар колдонулуп, чыгарылган газдар жаратылышты коргоо стандарттарына жооп бергенин айтышты. Ошондой эле расмий түрдө кечирим сурашты.

Шигадзе жергиликтүү бийлиги 21-сентябрда окуяны иликтөө үчүн атайын топ түзүп, мыйзам чегинде маселени чече турганын жарыялады.