Чектөөлөргө карабай WhatsApp Орусияда эң популярдуу бойдон калды

Meta компаниясына таандык WhatsApp мессенжери үн чалууларга чектөө киргизилгенине карабастан Орусияда аудиториясы эң кең тиркеме болуп калууда. Бул тууралуу чет элдик басылмалар жазышты.

Буга чейин Байланыш, маалыматтык технологиялар жана массалык коммуникациялар жаатындагы көзөмөл боюнча федералдык кызматы (Роскомнадзор) WhatsApp жана Telegram аркылуу жасалган алдамчылык, мажбурлоо, диверсиялык жана террористтик аракеттер көбөйгөнүн белгилеп, үн чалууларды чектегенин билдирген. Бирок мессенжерлердин тексттик жазышуулары жана каналдары жеткиликтүү бойдон калууда. WhatsApp болсо жашыруун шифрлөөнү (end-to-end) сактап, 100 миллиондон ашык колдонуучуга коопсуз байланыш берүүнү улантарын жарыялады.

Mediascope маалыматтарына ылайык, 2025-жылдын августунда WhatsApp’тын айлык аудиториясы 97 миллион адамга жетип, лидерлигин сактап калды. Андан кийин VK жана Telegram турат. Орточо күнүмдүк аудитория боюнча да WhatsApp 82,1 миллион менен биринчи орунда.