Жапаров АКШ президентинин Борбор Азия боюнча атайын өкүлү менен жолугушту

Өлкө башчысы Садыр Жапаров Нью-Йорк шаарында Америка Кошмо Штаттарынын президентинин Түштүк жана Борбор Азия боюнча атайын өкүлү Серджио Гор менен сүйлөшүүлөрдү өткөрдү.

Анда экономикалык өз ара аракеттенүү чөйрөсүндөгү мамилелерди чыңдоо маселелери талкууланды. Мындан тышкары, миграциялык процесстерди көзөмөлдөө маселелери каралды.

Президенттик администрация билдиргендей, тараптар аталган багытта конструктивдүү диалогду өнүктүрүүгө өз ара кызыкдарлыктарын баса белгилешти.

Жапаров Кыргызстан АКШнын президенти Доналд Трамптын администрациясы менен активдүү кызматташууга жана региондо туруктуу өнүгүүнү жана стабилдүүлүктү камсыздоого багытталган биргелешкен демилгелерди илгерилетүүгө даяр экенин белгиледи.

Жыйынтыгында тараптар жогорку жана эң жогорку деңгээлдеги саясий диалогду улантууну макулдашты.