Молдовада массалык баш аламандык уюштурууга шектелип 74 адам кармалды

Улуттук тергөө инспекциясынын кызматкерлери PCCOCS прокуратурасы, "Fulger" атайын багыттагы полиция бригадалары жана Маалымат жана коопсуздук кызматынын колдоосу менен 22-сентябрда Молдова боюнча масштабдуу операция өткөрүштү.

МОЛДПРЕС агенттигинин маалыматына караганда, операция учурунда 250дөн ашык тинтүүлөр жүргүзүлүп, ар кайсы аймактардан 100дөн ашуун адам кармалды.

Полициянын маалыматы боюнча рейддер өлкөнүн бир нече аймактарында өттү. 74 адам 72 саатка чейин кармалып, алардын басымдуу бөлүгүн 19дан 45 жашка чейинкилер түзгөн. Алар системдүү түрдө Сербияга барган. Молдованын полиция башчысы Виорел Чернэутянунун айтымында, айрым шектүүлөр сапардын чыныгы максатын билдирбей, кийинчерээк Молдовада баш аламандык жана абалды туруксуздандыруу үчүн даярдык көрүп жаткандары аныкталган.

Ал эми Молдовадагы Социалисттер партиясынын лидери Игорь Додон тинтүүлөр өлкөнүн түндүк аймактарында социалисттик партия өкүлдөрүнүн үйлөрүндө жүргүзүлгөнүн ырастады. Ал бийлик шайлоодон мурун жарандарды коркутуп, диктатура орнотууну көздөп жатканын билдирди.

Молдовада парламенттик шайлоо 28-сентябрга пландалган.