Оштун мэри жабылганына 10 жыл болгон психикалык оорукананын жерине эмне куруу керектигин айтты

Бүгүн, 24-сентябрда Ош шаарынын мэри Жеңишбек Токторбаев таңкы рейддик кыдыруу алкагында 10 жылдан бери пайдаланылбай таштандыга толуп, имараттары четинен урап жаткан мурунку психикалык оорукананын абалын көрүп чыкты.

Мэриянын басма сөз кызматы билдиргендей, оорукана ишин токтоткондон тарта имараттары жана айлана тегереги такыр каралган эмес. Чөптөр жана жапайы бадалдар өсүп имараттарга кирүүгө мүмкүн болбой калган.

Мэр жерди тез арада мэриянын балансына алып, оорукана, поликлиника катары жаңыдан куруу зарылдыгын белгиледи. Анткени шаар ичинде бош жер аянты жок болгондуктан оорукана куруу зарылдыгы курч. Ошондой эле оорукана аймагына курулуп кеткен бир катар турак үйлөрдүн мыйзамдуулугун текшерүүнү тапшырды.