Кыргызстанда "Улгайган жарандарга көңүл буруу жана камкордук" иш-чарасы башталды

Эмгек министрлиги 15-сентябрдан 15-октябрга чейин өтүүчү "Улгайган жарандарга көңүл буруу жана камкордук" урааны астында бир айлык башталганын кабарлады.

Маалыматка ылайык, иш-чара өкмөттүн 2012-жылдын 10-апрелиндеги №237 токтомунун алкагында өткөрүлүп, улуу муундун жашоо сапатын жогорулатууга, улгайган жарандардын кадыр-баркын сыйлоо жана камкордук салтын бекемдөөгө, ошондой эле коомчулуктун көңүлүн социалдык коргоо маселелерине бурууга багытталган.

Бир айлыктын алкагында өлкө боюнча социалдык, медициналык, укуктук иш-чаралар, маданий-агартуу жолугушуулары, өз ара жардам көрсөтүү акциялары, кайрымдуулук демилгелери уюштурулат.

Министрлик бардык жарандарды, коомдук бирикмелерди жана бизнес-структураларды бул иш-чарага активдүү катышууга жана улгайган жарандарга болгон көңүл буруу менен камкордукту айлык маалында гана эмес, күн сайын көрсөтүүгө чакырат.