Италиялык атактуу актриса Клаудия Кардинале дүйнөдөн кайтты

Италиялык атактуу актриса Клаудия Кардинале 87 жашында Парижге жакын жайгашкан Немур шаарында, балдарынын курчоосунда көз жумду. Бул тууралуу чет өлкөлүк басылмалар жазышты.

Маалыматтарга ылайык, анын өлүмүнүн так себеби айтылган жок. Аны менен коштошуу аземинин убактысы жана жери да азырынча белгиленген эмес.

Клаудия Кардинале 1938-жылдын 15-апрелинде Тунисте сицилиялык үй-бүлөдө төрөлгөн. 1958-жылы Марио Моничеллининин "Кадимки тааныштар" тасмасында эпизоддук ролу менен дебют кылган. Актриса 150дөн ашык тасмада ойногон жана Федерико Феллини менен Лукино Висконти сыяктуу атактуу режиссёрлордун музасы болгон. Ал "Рокко жана анын бир туугандары", "Бир жолу Жапайы Батышта", "Сегиз жарым", "Кызыл чатыр", "Римдик жолугушуулар" жана башка тасмалардагы ролу менен атактуулукка жеткен.

Кардинале Брижит Бардо, Ален Делон, Марлон Брандо сыяктуу атактуу артисттер менен иштешкен. Ал 1993-жылы Венецияда "Алтын арстан", 2002-жылы Берлинде "Алтын аюу" сыйлыктарына татыган. Италиянын маданият министри Алессандро Жули аны "эң улуу италиялык актрисаларынын бири" деп баалаган.