Мурунку депутат ири өлчөмдөгү алдамчылык фактысы боюнча кармалды

Өзгөчө ири өлчөмдөгү алдамчылык фактысы боюнча "Береке курулуш компаниясы" ЖЧКсынын директору, "Кыргызстан" саясий партиясынан Жогорку Кеңештин мурдагы депутаты С.У. кармалды. Бул тууралуу бүгүн, 24-сентябрда УКМКнын маалымат борбору билдирди.

Тактап айтканда, 2019-жылдын 4-апрелинде депутат менен А.А. аттуу жарандын ортосунда көп кабаттуу турак үй куруу жөнүндө үлүштүк катышуу келишими түзүлгөн. Келишимдин алкагында аталган жаран эл өкүлүнө Ош шаарынын аймагынан 45 сотук жер тилкесин берген. Келишимдин шарттарына ылайык, курулуш компаниясы курулуп жаткан көп кабаттуу турак жайдын жалпы аянтынын 2750 чарчы метрин курулуш иштери аяктагандан кийин А.А.га өткөрүп берүүгө милдеттендирилген. Бирок депутат өзүнүн таасирин пайдаланып, келишимдик милдеттенмелерин аткарбай, жер тилкесин өзүнүн атына мыйзамсыз каттатып алган.

Жүргүзүлгөн тергөө иштеринин жыйынтыгы боюнча, С.У.га Кылмыш-жаза кодексинин 4-бөлүгүнүн, 1-пункту (Өзгөчө ири өлчөмдөгү алдамчылык) боюнча айып тагылып, камакка алынды. Учурда тергөө иштери уланууда.