Нарын шаарындагы Ленин жана Шералиев көчөлөрүн асфальттоо боюнча маалымат берилди

Нарын шаарындагы Ленин көчөсүндө жол курулуш иштери уланууда. Бүгүнкү күнгө карата көчөнүн оң тарабына 5,4 чакырым, ал эми сол тарабына 3чакырым асфальт басылды. Бул тууралуу бүгүн, 24-сентябрда Транспорт жана коммуникациялар министрлигинин маалымат кызматы билдирди.

Маалым болгондой, долбоорго ылайык, 4 тилкеден турган жолдун ар бир тилкеси 3,5 метр болуп, жалпы унаа жүрүүчү бөлүктүн туурасы 14 метрди түзөт. Тротуардын кеңдиги 2,25 метр. Аны менен катар жарыктандыруу иштерине даярдыктар кызуу жүрүп жатат.

"Жеринде жалпы 100 техника жана 200 кызматкер иш алып барууда. Ал эми Шералиев көчөсүндө кемчиликтерди жоюу иштери уланып, бир тарабында лоток орнотуу иштери толугу менен бүткөрүлдү. Ошондой эле жөө жүргүнчүлөргө ыйлайыкталган тилкеде асфальтка даярдыктар жүрүп жатат. Курулуштун сапатына жана графиктин аткарылышына өзгөчө көңүл буруу тапшырмасы коюлган",- деп белгиленген маалыматта.

Кошумчалангандай, Ленин көчөсүнүн узундугу 9 чакырымдан ашык, ал эми Шералиев көчөсү 2,3 чакырымды түзөт.

Белгилей кетсек, УКМКнын башчысы Камчыбек Ташиев аталган көчөлөрдү толук бүтүрүү үчүн 10-октябрга чейин убакыт берген.